recent
أخبار ساخنة

طرق السفر لأمريكا لخريجى كليات العلوم الطبية

ِAhmed Gaber
الصفحة الرئيسية

 طرق السفر لأمريكا لخريجى كليات العلوم الطبية


 
السلام عليكم خريجى وطلبة الكلية من قسم التحاليل الطبية
بما انى اتخرجت من قبل 5 سنين وشوفت كتير فى المجال دة فحبيت اوفر على البعض الطريق فى حاجة انا بحثت فيها وعرفتها الحمد لله كويس بمساعده بعض الزملاء وبما انكم مهتمين بالموضوع يبقى انتم اولى بالكلام ده من غيركم وبما ان اللى طلب الموضوع ده مهتم بالهجرة او العمل بامريكا يبقى لازم نساعده من بداية الطريق علشان يقدر يجهز نفسة بدرى وياريت لو حد عنده معلومه زياده ميبخلش علينا بيها سواء كان مقيم فى امريكا او مصر .. فى المقال دة انا هقسم الموضوع لـ 3 مراحل

اولاً:- مرحلة التجهيز
ودى المرحلة ما قبل التخرج ودى بتكون عباره عن انك تقوى لغتك كويس جداً عن تجربة شخصية البداية فى التركيز على اللغة فى ايام الكلية مع الوقت بيتحسن بسرعة خصوصاً وانت بتذاكر كتب باللغة الانجليزية وطبعاً بما اننا اغلبنا اسر متوسطة فمش هنضيع الفلوس على الكورسات اللى اغلبها عن تجربة برضة مضيعة للفلوس الموضوع مش محتاج غير صديق يكون محب للغه ذيك او زميل فى لغات وترجمة دى الخطوة الاولى فى التجهيز الخطوة التانية انك تركز على الكتب اللى انا هحطها فى المرفقات من البداية بمعنى تذاكرها كويس جداً لو بدأت بدرى هتنجز بدرى انما هتتأخر هتلاقى نفسك نزلت مرة واتنين وتلاته كمان يبقى الافضل انك تذاكر من اول سنة رابعه على الاقل

ثانياً:- ما بعد التخرج
مرحلة بعد التخرج مطلوب منك حجات كتيرة بس ممكن تجتازها ان شاء الله لو انت حلمك توصل بجد وتسافر امريكا تشتغل فى مهنتك مش اى مهنة تانية ركزو معايا لأن هنا فية خيارات كتيرة ومتشعبة ..
فى الاول بعد التخرج عالطووووول تقدم فى دبلومة بايوكمسترى او ميكروبايولوجى متضيعش اى فرصة شوف الكلية المتاح فيها وقدم عالطول لأن كل يوم محسوب من عمرك فما بالك بالسنة بالنسبة للشباب هيكون عندك جيش انا عارف بس برضة متخليش الجيش عائق "وادعى ربنا تدخل عسكرى برضة علشان متاخدش غير سنة" اما لو انت اخدت اعفاء وربنا كرمك يعنى يبقى تبتدى تدور على شغل فى مكان "كويس" يعنى ايه كويس؟؟؟
بمعنى ان المكان اللى هتشتغل فية يكون كيان او مؤسسة متكاملة ذى البرج او المختبر او مستشفى ذى السلام او دار الفؤاد او اى مستشفى او مختبر فيه HR ومسجل فى الصحه وله سجل تجارى مكان يعتمد علية فى حال مراسلتة من قِبل الجهة اللى بتاخد منها رخصة مزاولة المهنة الامريكية
بالنسبة لخريجى علوم طبية محتاجين خبرة 3 سنين فى المكان اللى هما هيشتغلو فية وبعدها يقدروا يقدموا مباشراً على ترخيص مزاولة المهنة الامريكية اما علوم الحكومية فمطلوب منهم 5 سنين خبرة علشان يقدروا يقدموا .. طيب بما انك زعلت لما سمعت موضوع الخمس سنين والتلت سنين ده ليك عندى حل ايه هو؟؟؟؟
الحل فى الجامعه الامريكية .. ايوة فية برنامج بتقدمة الجامعة الامريكية لخريجى الكليتين يقدروا يلتحقوا بيه وبعده يقدروا يدخلوا مباشرة على الامتحان المزاولة عالطول بس فية مشكلة صغيرة البرنامج التأهيلى ده ب 11 الف جنية !!! متزعلش نفسك بس ما انت هتكون بتشتغل حاول بقى تدبر من فلوس الشغل دى المبلغ بحيث انك تاخد البرنامج دة وتختصر الطريق وانت برضة كدة كده مطالب يكون عندك خبرة اصلاً لما تسافر هناك يبقى كل اللى عليك فى المرحلة دى انك تاخد بعضك وتروح الجامعة الامريكية وتسأل عن البرنامج المعتمد من الجامعة اللى اسمة تمهيدى ASCP والمشرف علية الاستاذ الدكتور حسن عزازى وهما هيدوك كل التفاصيل عنه
نسيت اقولك كمان انهم بيقدموا منحة سنوية وبياخدوا بعض الطلبة مجاناً هى فرصتها ضعيفة "المنحة" لكن مش مستحيله يمكن ربنا يكرمك وتكون واحد من اللى بيختاروهم.

النصيحة فى المرحلة دى انك تذاكر كويس جدا كل الكتب اللى هتكون فى المرفقات وتراجع كل حاجة كويس جدا وتتعلم شغل المعمل بصورة كويسة وتكتسب خبرة تقدر تنافس بيها هناك "سيبك من سوق العمل هنا خالص بما انك ناوى على هناك يبقى ميهمكش غير توصل لهدفك" ومتدخلش نفسك فى حوارات عقيمة بلدنا هتفضل كدة عمرها كله فـ انت خد اللى تقدر علية ويساعدك وطيييير

ثالثاً:- مرحلة التقديم على الـ ASCP والهجرة
فى المرحلة دى المفروض انك خلصت كل الحجات اللى فوق دى وباقى مرحلة واحدة وهى مرحلة التقديم على ترخيص المزاولة فية ملف من اعداد زميل فية مجهود ربنا يكرمه عليه اسمه دكتور ياسر حاصل على الشهادة دى وكمان ملف لكيفية معادلة الشهادات من اعداد دكتور ايمن وهو برضة حاصل على الشهادة وكاتب فية ادق التفاصيل برضة هتلاقوى الملفات دى فى اخر الموضوع ان شاء الله هتوضح للجميع اية الخطوات اللى المفروض يمشوا عليها لغاية الحصور على الشهادة بس ليا كام نقطة علشان تختصر عليكم الطريق
- ترجم كل شهاداتك للانجليزية ومتنساش شهادات الدرجات بتاعت الكلية والدبلومة
- ترجم شهادة الخبرة او يكون افضل لو هى باللغة الانجليزية
- فية نماذج لشهادات الخبرة المفروض انك بتبعتها لهم وهتحتاج مساعدة من مديرك المباشر فى العمل"المختبر" انه يكتبها او انت تجهزها وهو يمضى عليها ويختم
- شهادة الـ ASCP الدولية معتمدة فى امريكا وبتقدر تشتغل بيها عالطووووول طالما انها معتمدة من الولاية "بمعنى" لازم تتأكد من الولاية اللى هتسافر لها انها معتمدة هناك للشغل مباشر
- تعبك فى مصر للحصول على الشهادة دى هيوفر عليك تعب اكتر بكتييييييييييييير هناك علشان تحصل عليها علشان كدة متكسلش لو انت بجد ناوى ع السفر
- كل معلومة انت بتذاكرها وتراجعها وتتعلمها فى مصر هتفيدك هناك وحاول تنسى الشكل النمطى اللى فى مخيلة كل واحد فينا عن المعامل العادية بتاعتنا

خلال كل اللى انا بقولك علية ده تبتدى تقدم سنوياً على اللوترى اللى هى القرعة العشوائية للهجرة لامريكا وتقدم على فيزا سياحة وتشوف كل الطرق وتطرق كل الابواب وعلى فكره فى حالة حصوله على الشهاده ASCP تقدر تقدم اونلاين على موقع لينكد ان او موقع Glassdoor وبكل امانه يوميا عشرات الوظايف تنشر على المواقع دى بمعنى ان فرص العمل هناك متاحة لكن التحدى انك تكون مؤهل بجد للفرص دى ومتسمعش لكلام اى حد يحبطك بانها فقط للامريكان او ما الى ذلك بالعكس مفيش وظيفة واحده منهم بيكون مكتوب فيها للامريكان فقط كل ما عليك انك تبتدى وتجهز كل شئ وان شاء الله تقدر توصل
بالتوفيق ولو فية اى سؤال ممكن تسأل فى الكومنتات وانا لو اعرف اجابة هرد عليك عالطول
"كل الملفات اللى تحدثت عنها هرفقها فى اللينك الموجود اسفل الموضوع"

الملفات الكاملة المشار اليها فى الموضوع:- http://bit.ly/2bomsAU
اسئلة للمراجعه للحصول على الـ ASCP هنا:-   http://bit.ly/1q7t21C

للتواصل والاسئلة اضغط هنا

google-playkhamsatmostaqltradent