recent
أخبار ساخنة

سؤال وجواب فيما يخص التحاليل الطبية بالكويت

ِAhmed Gaber
الصفحة الرئيسية

سؤال وجواب فيما يخص التحاليل الطبية بالكويت

*هذة التدوينة خاصة بطرق السفر من جمهورية مصر العربية فقط*

نظراً للظروف اللى تغيرت الايام اللى فاتت بسبب انشغالى فى بعض الامور هحاول اجاوب اكبر قدر من الاسئلة المطروحة على الجروب الخاص بـ الجالية المصرية لأخصائى التحاليل الطبية بالكويت ونشرها فى المدونة علشان تكون مرجع للزملاء دائم ان شاء الله للرجوع الية قبل السؤال او الاستفسار وفى حال سؤالك غير موجود يسعدنى اجاوبك اذا كانت الاجابة عندى ان شاء الله

1- اللي طلع ترخيص قريب  ايه الشهادات اللي اجبها اللي بتكون متوثقة ؟؟
يفضل لأى مسافر لسه هيدور على شغل انه يوثق اى شهادات معاه يمكن توثيقها لأن فى حال طلب توثيق شهاده بعد سفرك هيكون المبلغ عالى ومُكلّف فالافضل توثيق اللى تقدر علية من الشهادات.

2- كم متوسط مرتبات الفنيين والاخصائيين فى الكويت ؟؟
المرتب يعتمد بالاساس عليك انت على خبراتك ودراساتك وكمان حاجه المكان ليك واتفاقك مع المكان ولكن المرتب فى الايام الحالية بسبب التنافسية العالية حالياً ممكن يكون 300 مثلاً وممكن يقل او يذيد حسب المكان دى بالنسبة لخريجى كليات العلوم الطبية والعلوم الاساسية اما الزملاء من خريجى معهد فنى فممكن اقصاه يكون 200 دينار لان هما بيكونوا مساعدين وسحب عينات فقط.

3- هل الشغل فى الكويت شيفت واحد ولا شيفتين ؟؟
 برضة على حسب المكان اللى هتقدم فية النظام فى الاغلب بيكون شيفت واحد 8 ساعات متصلين ولكن برضة بيكون فية 4 ساعات الصبح و 4 ساعات بعد العصر وفى الاغلب نظام الشيفت المنفصل بيكون فى المستشفيات لأن فى اوقات العيادات بيكون مطلوب عدد اكبر نظراً للازدحام.

4- تصنيفى اية فى الكويت "او" المسمى الوظيفى اية فى الكويت ؟؟
السؤال دة تقريباً بتسأله يومياً المسمى الوظيفى فى الكويت باللغة العربية "فنى" حسب القانون المنظم للمهن الصحية بالكويت لخريجى كليات العلوم والعلوم الطبية ومع ذلك بيتكتب فى بعض المعامل والمستشفيات "ممارس" ويترقى الى "ممارس اول" وهكذا الى ان يصبح "اخصائى" ولكن ده بعد درسات عليا وخبرة طويلة وفقط فى مستشفيات الوزارة.

5- هل بيقبلو التصنيف المزدوج واى قسم افضل ؟؟
" كيمياء حيوى - مايكروبيولوجى - كيمياء مايكرو" الاقسام اللى كتبتها دى تمشى ذى الصاروخ فى التراخيص ولا غبار عليها يعنى مش ناقصة غير الدبلومه وسنتين الخبرة وبس اما الاقسام المزدوجه التانية بقى فيها اقوال من الوزارة وحسب ما يحددو هما.

6- ممكن تلاقيلى فرصة عمل او تبعتلى فيزا ؟؟
انا للاسف معنديش اى فكرة عن اذاى اجيبلك فرصة عمل لكن ممكن تبعتلى ورقك اقدملك لو ظهر قدامى فرصة غير كده انا مقدرش اعملك اى حاجة تانى لأنى انا جيت بالتقديم ذى اى حد وبعت ورقى واتبعتتلى الفيزا لو مش عارف ممكن تتكلم مع مكتب سفريات وهو هيحللك المشكله دى لكن انا ممكن اساعدك بالتقديم فقط.

7- هل شهادة بيان الدرجات مهمه واذى ممكن اطلعها ؟؟
شهادة بيان الدرجات مهمة فى التقديم على المزاولة بالكويت من ضمن الاوراق المطلوبة وكيفية استخراجها من شؤون الطلبة وفى حال الطلبة اللى مش قادرين يستخرجوها للبكالوريوس ممكن يستخرجوا بتاعت الدبلومة وهتأدى نفس الغرض.

8- هل لازم شهادة الخبرة تتوثق ؟؟
شهادة الخبرة لازم بسنتين والافضل توثيقها لو تقدر ولكن علشان صعوبة توثيق الشهادات دى فى مصر فممكن تستعملها بدون توثيق وان شاء الله هتتقبل بدون مشاكل وبالنسبة لطلبة العلوم الطبية سنة الامتياز بتتحسب خبرة ولكن يفضل انك تاخد على الاقل شهاده سنتين بعده كخبرة.

9- دبلومة البيو ولا الميكرو أهم ؟؟
مفيش دبلومه مميزة عن التانية الاتنين تقدر من خلالهم تطلع ترخيص مزاولة بمعنى ادرس القسم اللى انت راغب فية ومتقلقش ولكن خللى بالك الدبلومة اللى هتاخدها هتكون هى القسم بتاعك فى الشغل بمعنى لو انت واخد مايكرو فى الاغلب هتمسك المايكرو بشكل اكبر وهكذا.

10- اية رئيك فى المعامل الصغيرة ؟؟
فى رأى المعامل الصغير قليله الامكانيات والفروع الخاصة بالاماكن الكبيرة الشغل فيها اكتر من سنتين هو مضيعة للعمر والمستقبل المهنى لأن مفيش من وراها ميزة تعود عليك يعنى انت لا بتتعلم ولا كمان بتكسب خبرة كويسة فالافضل انك تتعلم فيها الاساسيات وتشوف غيرها.

دى اشهر الاسئلة اللى بتوصلنى دائماً
التدوية متجددة لو فية سؤال جديد هضيفة

اى حد عندة سؤال لا يتردد فى انه يتواصل معى على الحساب الشخصى على الفيس من
 
author-img
ِAhmed Gaber

تعليقات

5 تعليقات
إرسال تعليق
  • Unknown photo
    Unknown3 يناير 2017 في 3:24 ص

    جزاك الله خيرا

    حذف التعليق
    • Unknown photo
      Unknown8 يناير 2017 في 10:10 م

      السلام عليكم ورحمة الله وبركاته
      أخي الكريم
      ممكن شرح تفصيلي عن مبدأ وكيفية عمل جهاز كيميا الدم slaip وكيفية معايرته
      ولكم جزيل الشكر

      حذف التعليق
      • Unknown photo
        Unknown10 سبتمبر 2018 في 2:06 م

        حاصل علي دكتوراه - كليه الزراه تخصص كيمياء حيويه + ترخيص مزاوله مهنه كيميائي طبي - اداره التراخيص - وزاره الصحه مصر فما هو تصنيفي والمسمي الوظيفي الخاص بي [email protected]

        حذف التعليق
        • غير معرف30 مارس 2020 في 4:26 م

          حاصلة على علوم صحية وادرس حاليا دبلوم كمياء حيوى طبى فا توصيفى والمسمى الوظيفى الخاص بى
          وشكرا لحضرتك

          حذف التعليق
          • غير معرف12 يونيو 2020 في 4:18 ص

            بالنسبه لخريجي المعاهدالفتيه ممكن يقدموازاي وهل ليهم ترخيص مزاوله مهنه والمعامل الخاصه بيبقي ليهم شغل ولالا

            حذف التعليق
            google-playkhamsatmostaqltradent